www.commona.org  
 
بایکۆتی ڕیفراندۆم هەنگاوێکە بۆ سەربەخۆیی
یەکێتی کۆمۆنیستەکان لەعێراق


بایکۆتی ڕیفراندۆم هەنگاوێکە بۆ سەربەخۆیی
ڕاگەیاندنی یەکێتی کۆمۆیستەکان سەبارەت بە ڕیفراندۆمی ٢٥ی ئەیلول

رۆژی دیاریکراو بۆ ئەنجامدانی ڕیفراندۆم نزیک دەبێتەوە، ململانێ و کێبەرکێی هێزەکان لە سەر ئەو پرسە توندتر بووەتەوە، ماشێنی جەنگێکی سایکۆلۆژی بۆ ترساندن و سترێسکردنی خەڵکی کوردستان و بەتایبەتی دانیشتوانی ناوچە جێناکۆک و کێشە لەسەرەکان خراوەتە گەڕ، زۆرینەی خەڵکی کوردستان بێدەنگ و بێ ئیرادە کراون و تەنها تەماشایان بۆ ماوەتەوە، هاوکات نیگەرانی و چاوەڕوانی باڵی کێشاوە بەسەر پرۆسەکەدا.

هەڵبەت ئێمە ئەوە دووپات دەکەینەوە کە بەرگری دەکەین لە مافی دیاریکردنی چارەنوسی خەڵکی کوردستان و زەمینەسازی بۆ بەدیهێنانی ئەو مافە و سەپاندنی بەکردەوەی بەسەر دەوڵەتی ناوەندی و ووڵاتانی ناوچەکە و زلهێزەکاندا ، هەروەها هەنگاونانی کۆتایی بۆ بڕیاردان و یەکلاکردنەوەی کێشەی کورد لەڕێگەی جیابوونەوەی هەرێمی کوردستان یاخود مانەوەی دڵخوازانە لە عێراقێکی ئازادو دیموکراتیدا پەیوەستە بە بڕیاری خەڵکی کوردستانەوە و لەم روانگەیەشەوە ئەنجامدانی ریفراندۆم هەم بە ماف و هەم بە رێگاچارەیەکی دیموکراتی گونجاو دەزانین، هەموو ئەو بڕیار و هەڵوێستانەش ئیدانە دەکەین کە لەلایەن ئەمریکا و وولاتە زلهێزەکانەوە بۆ دژایەتی چارەسەری دیموکراتی کێشەی کورد دەریدەبڕن، هەروەها هەڵوێست و سات و سەودای حکومەتەکانی عێراق و ئێران و تورکیا بۆ دژایەتی مەسەلەی کورد لە ناوچەکەدا، ئیدانە دەکەین و بەمەترسی جددی دەزانین لەسەر ئەمنیەت و ئاسایشی خەڵکی کوردستان و ناوچەکە بەگشتی.

هاوکات بە دیاریکراوی ئەم ریفراندۆمەی ئێستای پارتی دیموکراتی کوردستان و هاوکارەکانی پرۆتستۆ دەکەین، چونکە بە پڕۆژەیەک و بڕیارێکی نازانین کە لەم پێناوەدا بێت، بەڵکو گەمەکردنە بە پرسی نەتەوەیی کورد و بەکارهێنانێتی وەک کارتی فشار بۆ خۆسەپاندن و درێژەدان بە ئەزموونی حوکمڕانی شکستخواردووی هەرێم و پاراستن و قایمکردنی پنتەکانی ئەو دەسەڵاتەیە لەبەرامبەر خەڵکی کوردستان و نەیارو رکابەرەکانیدا.

ئەم بڕیارەی دراوە، گەڕانەوە نیە بۆ خەڵکی کوردستان بۆ ئەوەی لەبارەی ئەم پرسە گرنگەوە بڕیاری خۆیان بدەن، هەروەها درێژەی ئامادەکاری و هەوڵ و تێکۆشان نیە بۆ جیابوونەوە لە عێراق و پێکهێنانی دەوڵەت و قەوارەیەکی سەربەخۆ لە کوردستان، کە تیایدا هاوبەشی و هاوژیانی کورد و پێهاتەکانی تر دابین بکرێ و بنەمای دەسەڵاتەکەی ئازادی و خۆبەڕێوەبەری بێ، بەکردەوە قەوارەیەکی سەربەخۆ بێ کە دانیشتوانەکەی خۆیان بەخاوەنی بزانن و هەست بکەن لە چوارچێوەیدا ژیان و گوزەرانیان بەرەو باشتر دەڕوات و لە ئازادی و لە ژیان و خزمەتگوزاری سەردەمیانە و ئاسایشی زیاترو ئاسودەیی کۆمەڵایەتی بەهرەمەند دەبن.

بەپێچەوانەوە کۆی پڕۆژەی ئەم ڕیفراندۆمە هەوڵێکە بۆ نەبوونی ئەوانە، هەربۆیە لەم پرۆسەیەدا زەقتر لەپێشوو ناکۆکی بەرژەوەندیەکانی کرێکاران و زەحمەتکێشان و زۆرینەی خەلکی کوردستان لەگەڵ بەرژەوەندی و بڕیار و سیاسەتەکانی دەسەڵاتدارانی بۆژروا- ناسیونالیستی کورددا بەتەواوی دەرکەوتووە، تا ئەو ڕادەیەی کە هەڵگرتنی کارتی نەتەوەیی و یاریکردن بەپرسێکی گشتی لەوجۆرە و کولانەوەی زامێکی سەد ساڵە هێشتا نەیتوانی ئەو ناکۆکیە زەق و رەقە بشارێتەوە، لەجاران زیاتر ئاشکرابووە کە دەسەڵاتدارانی بۆرژوا -ناسیونالیستی هەرێم، تەواوی سیاسەت و بەرنامەکانیان بۆ قایمکردنی زیاتری دەسەڵاتدارێتی ستەمکارانەی خۆیانە و بەکارهێنانی کارتی ستەمی میللی لەم قۆناغەدا هەوڵێکی ترە لە پێناوی ئەوەی لەسەر ئاستی عێراق بەشی زیاتر بپچڕن و لە ناوخۆی هەرێمیش لەدەسەڵاتی رەها بەهرەمەندبن.

لەم روانگەیەوە ئێمە ئەم بڕیارەی دەسەڵاتدارانی هەرێم رەتدەکەینەوەو بایکۆتی دەکەین، بانگەوازی خەڵکی کوردستانیش دەکەین هەمان هەڵوێستی هەبێ و ئەوە بکەن بە پەیامێکی سیاسی ئاشکرا کە ئەوان تەواوی ئەزموونی حوکمڕانی هەرێم رەتدەکەنەوە و بڕیار و پڕۆژە ستەمکارەکانیان پرۆتستۆ دەکەن، ڕیزەکانی خۆیان لەو هێزانە جیادەکەنەوە و چی تر نایانەوێ کایە بە ژیان و گوزەران و پرسە گرنگەکانیان بکرێ. ئەم بایکۆتەش گرێبدرێتەوە بە ڕێخستنی بەرەنگاریەکی گشتی تر دژ بە کۆی ئەزموونی دەسەڵاتدارێتی ئەم هێزە ناسیونالیستیە کۆنەپەرستانە لەکوردستاندا، بکرێت بە بەشێک لە ئامادەکاری سیاسی و ئابوری و کۆمەڵایەتی بۆ پێشگرتن بە مەترسی دەوڵەتانی ناوچەکە و پیلانگێڕی و سات و سەودای ئەوان دژ بە خەڵکی کوردستان، کە بەردەوام لەهەوڵدان بۆ مانەوەی حیزبە بۆرژوازیەکانی کوردستان وەک دەسکەلاو هێزی پرۆکسی سەر بەخۆیان، بکرێت بە دەسپێک بۆ خۆئامادەکردن و زەمینەسازی بۆ ئەنجامدانی ریفراندۆمێک کە کێشەی کورد تیایدا یەکلایی بکرێتەوەو ئەنجامەکەی بنیاتنانی قەوارەیەکی سیاسی نوێ بێت کە ژیان و گوزەرانی خەڵک و سەربەخۆیی تیادا مسۆگەربێت.

یەکێتی کۆمۆنیستەکان لەعێراق

کۆمیتەی ناوەندی

٢٢ی ئەیلولی 2017