www.commona.org  
 
بایکۆت ، رووداوێکی سیاسی بوو !
عەلی مەولود



بەپێی ئەو هەواڵانەی دوای دەنگدانی گشتی لێرەو لەوێ بڵاوبوونەتەوە لەشارەکانی سلێمانی و هەڵەبجەو دەڤەرەکانی گەرمیان و راپەڕین، بایکۆت دیاردەیەکی ئامانجداری بەرچاو بووەو بەشێوەیەکی گشتی لەپێش هەردوو بژاردەی بەڵێ و نەخێر بووەو لەهەندێ شوێن بەهەردوو بژاردەی بەڵێ و نەخێر نەگەیشتوونەتە ئاستی بژاردەی بایکۆت و لەهەندێ شوێنیش پارسەنگی هەردوکیان بووە.

لە ناوچەکانی کەرکوک و خانەقین و تێکڕای ناوچەکانی زۆنی زەرد، بەرزی رێژەی بەشداری کردن بەرادەیەک بووە کە ناڕاست بوونەکەی هیچ گومان هەڵناگرێ و بەپێی هەندێک هەواڵ تا کۆتایی کاتی دیاریکراو ( ٦ی ئێوارە) رێژەی دەنگدان لەو ناوچانەش لە سلێمانی و هەڵەبجەو راپەڕین زۆر باڵاتر نەبووە، بەڵام لەو کاتژمێرەی لەکۆتاییدا لەسەر بنەمای کەمی رێژەی بەشداربووان زیادکراوە، رێژەکە بەشێوەی بەرچاوی گوماناوی هەڵکشاوە بە ئامانجی خۆ دوورخستنەوە لە شکستی پرۆسەکە.

ئەم بایکۆتە جەماعیە فراوانە هەرچەندە لە رەسمیاتدا هیچ حسابێکی لەسەر ناکرێ، بەڵام لە واقیعی کۆمەڵایەتی و سیاسیدا رەتکردنەوەی دۆخی سیاسی ئێستاو دەسەڵاتی سیاسی ئێستایە کە بەهۆی جۆری حوکمداری و بەرنامەی ئابووریەکەیانەوە کۆمەڵگەی کوردستانیان رووبەڕووی مەترسی گەورە کردۆتەوە، ئەم هەڵوێستە بەجۆرێک بەرجەستە بووە تەنانەت بەڵێن و بانگەشەی مەسەلەیەکی هەستیارو گرنگی وەک سەربەخۆیی بۆ خەڵکی کوردستانیش !!!، نەیتوانی بیشکێنێت، ئەگەرچی بەشێکی برد بەڵام بە قایمی و راوەستاوی مایەوە، لەگەڵ ئەوەشدا کە حیزب و هێزێکی سیاسی گەورەی لەپشت نەبووەو راگەیاندنێکی بەرفراوانیش لەبەردەستیدا نەبووە.

هەڵبەت ئەو بایکۆتە جۆرێک خۆجیاکردنەوەو نەهی کردنە لە دەسەڵات و ئامانج و پرۆژەکانی و بەهیچ شێوەیەک لەبەرامبەر مافی دیاریکردنی چارەنووس و چارەی کێشەی نەتەوەیی و دروستکردنی قەوارەی سەربەخۆ بۆ خەڵکی کوردستان و جیابوونەوە لەمەترسیەکانی دەوڵەتی ناوەند دا نیە، بەڵکو ئەوە " نا " یەکی گەورەی پڕ ناواخن و مانا بەخشە بەرووی سیاسەت و ئامانج و وجودی دەسەڵاتدارانی ستەمکاری هەرێمداو جۆرێکە لە بەرەنگاری کۆمەڵایەتی خۆبەخۆیی، کە لەهەناویدا ئەگەری هەستانی جەماوەری و هەستانەوەی سیاسی، خۆی مەڵاسداوەو لەداهاتوودا بەشێوەو ئاستی جۆراوجۆر دەرکەوتنی دەبێت و لێکەوت و بەرکەوتنی دەبێت بەرووداوە گەورەکانی کۆمەڵگاوە، ئەوە رووداوێک و دیاردەکی سیاسیە ناکرێت و نابێت هەروا بە تەنیشتیدا تێپەڕین.